ஸ்ரீவைகுண்டத்தில் பரமனுக்குத் தொண்டு பூண்டு பெறக்கூடிய ப்ரஹ்மாந்தானுபவத்தைப் பெற வழிகள் இரண்டு - பக்தி அல்லது ப்ரபத்தி. இவ்வுபாயங்களை அனுஷ்டிக்க விரும்புவர்கள் பரப்ரஹ்மத்தின் கல்யாண குணங்களையும் பகவத் ஸ்வரூபத்தையும் நன்கு ஐயம் திரிபு அற அறிந்திருக்க வேண்டும். இவற்றை உணர்த்துவன உபநிஷத்துக்கள். இவற்றின் திரண்ட முடிவான கருத்தைப்புகட்டும் நூல் ப்ரஹ்மஸூத்ரங்கள். இதை இயற்றியவர் வ்யாஸர். ஸூத்ரங்களின் நுண்ணிய கருத்துக்களை விரித்துரைக்க எழுந்தவை பாஷ்யங்கள். இவை சங்கர பாஷ்யம், மத்வ பாஷ்யம் ராமானுஜர் இயற்றிய ஸ்ரீபாஷ்யம். இவற்றால் அறியப்படுவதை அத்வைத மதம், த்வைத மதம், விசிஷ்டாத்வைத மதம் என வழங்குகிறோம். ஒன்றுக் கொன்று முரண்படும் கருத்துக்களைக் கொண்ட மூன்று வைதிக மதங்களையும் இந்த மும்மத ஸாரம் என்னும் நூல் நமக்கு உள்ளங்கை நெல்லிக்கனி போல் எடுத்து விளக்குகிறது. மும்மதங்களையும் மூவகை மதத்தினரும், பிறரும் எளிதில் உணரும்படியும், மூவகையினரின் மனம் நோகாதவாறும் எடுத்தியம்புவது மிகக் கடினமான பணியாகும். இதற்கு சாஸ்திரங்களில் ஆழந்தும், அகன்றதுமான நுண்ணறுவும், நினைவாற்றலும் (ப்ரதியையும்) எதையும் ஆராய்ந்து பார்க்கும் உணர்வும் மிகத் தேவையாம்.